Ongantíð áður hevur stóri pallur á Summar Festivalinum verið so væl útgjørdur, sum hann er í kvøld.
Stóri pallur á Summar Festivalinum er vanliga tann størsti og best útgjørdi tónleikapallurin í landinum.
Pallurin verður leigaður uttanlands og verður útgjørdur til at kunna hýsa stórum konsertum á altjóða stigi. Nøvn sum Roxette, Zara Larsson, The Scorpions, Alan Walker, Cliff Richard, Westlife, Twisted Sister og onnur hava spælt á pallinum.
Teknisku krøvini til pall, ljóð og ljós eru ofta stór, men alt, sum gerast kann, verður gjørt fyri at liva upp til krøvini.
Í ár hevur danska poppstjørnan Rasmus Seebach tikið heili 4 treylarar við útgerð við sær til Føroya. Og tað kemur aftrat allari tøknini, sum Summar Festivalurin sjálvur brúkar og setur upp til stóru konsertirnar.
– Eg havi ongantíð áður upplivað so nógva tøkni á pallinum, sum tað verður til konsertina hjá Rasmus Seebach í kvøld. So um fólk vilja uppliva eina konsert á høgum altjóða stigi, so er at møta upp á Vágsbø í kvøld, sigur Samuel Jacobsen, pallstjóri á Vágsbø.
Ljóðtøkni hevur høvuðsábyrgdina av ljóð- og ljósútgerðini á Summar Festivalinum.
Konsertin við Rasmus Seebach verður á Vágsbø í kvøld klokkan 22.
(Myndin: Samuel og Ísak Jacobsen)
